‘चीनसँग पछिल्लो समय देखापरेको अविश्वास हट्नेछ’

चैत्र १०, २०७३- साताव्यापी चीन भ्रमणको पूर्वसन्ध्यामा प्रधानमन्त्री पुष्पकमल दाहालले आफ्नो भ्रमणले चीनसँग पछिल्लो समय देखापरेको अविश्वास हट्ने विश्वास व्यक्त गरेका छन् । बिहीबार वालुवाटारमा पूर्वप्रधानमन्त्रीहरु, पूर्व परराष्ट्रमन्त्रीहरु र पूर्व राजदूतहरुसँगको छलफलमा उनले यस्तो बताएका हुन् । प्रधानमन्त्री दाहालको भ्रमणमा कुनै ‘नाटकिय’ अवस्था सृजना नभए दुईपक्षीय महत्वका विषयमा थप सम्झौता नहुने स्पष्ट छ ।उनले कुनै सम्झौता नभए पनि राजनीतिक सहमति र चीनबाट नेपालतर्फ हुन नसकेको उच्चस्तरको भ्रमण गराउन आफू प्रतिवद्ध रहेको पनि बताएका छन् । छलफलमा सहभागी एक सदश्यका अनुसार उनले चिनियाँ राष्ट्रपति सी चिनपिङसँग गत असोजमा गोवामा भएका छलफललाई नै निरन्तरता दिने समेत बताएका छन् ।

प्रधानमन्त्री दाहालले ‘कनेक्टिभिटी’ को विषयमा सबैभन्दा पहिले काठमाडौंलाई चिनियाँ रेलले जोड्न केरुङ काठमाडौं रेलको बिस्तृत अध्ययन प्रतिवेदन, अन्तर देशिय विद्युत ट्रान्समिसन लाइन, पारवहन सम्झौता तथा इन्धन आपुर्तीको प्राटोकल तय र नेपाललाई व्यापारको रुपमा ट्रान्जिट प्वाइन्ट बनाउने विषयमा केन्द्रित रहेर छलफल गर्ने समेत बताएका छन् । चिनियाँ राष्ट्रपति र नेताहरुसँग गरिने छलफलमा कनेक्टिभिटि र दुईपक्षीय राजनीतिक विश्वास कायम गर्नमा नै विशेष जोड दिनुपर्ने सहभागिहरुको सुझाव छ ।

प्रधानमन्त्री बोआओ सम्मेलनमा सहभागी भएर बेइजिङ प्रस्थान गर्न लागेको भए पनि बेइजिङमा हुने वार्तामा नै छलफल केन्द्रित थियो । सहभागिहरुले पनि बेईजिङमा हुने दुईपक्षीय छलफलको विषयमा नै केन्द्रित भएर सुझाव दिएका थिए ।



छलफलमा पूर्व प्रधानमन्त्रीहरु शेरबहादुर देउवा, माधवकुमार नेपाल र झलनाथ खनाल, पूर्व परराष्ट्रमन्त्रीहरु रमेशनाथ पाण्डे, डा. रामशरण महत र डा. भेखबहादुर थापा तथा चीनका लागि पूर्व राजदूतहरु राजेश्वर आचार्य र टंक कार्कीसँगै चीनसँग आवद्ध केही ब्यापारीहरुको पनि सहभागिता थिए । छलफलमा गत वर्ष चीनसँग पारवहन सम्झौता गरेका पूर्व प्रधानमन्त्री केपी ओली सहभागि थिएनन । उनीसँग दाहालले छुट्टै छलफल गरेको पनि स्रोतले बतायो ।

दाहालले आफ्नो भ्रमणलाई सद्भावना भ्रमणको रुपमा ब्याख्या गरेका छन् । चीन नेपालको महत्वपूर्ण छिमेकी रहेकोले सकेसम्म चीनसँग विश्वासको वातावरण तय गरेर सम्बन्धलाई थप उचाईमा लैजान आफूले भरपुर प्रयास गर्ने दाहालले बताएको चीनका लागि पूर्वराजदूत राजेश्वर आचार्यले कान्तिपुरलाई बताए ।