निजी क्षेत्रको छाता संगठन उद्योग वाणिज्य महासंघको इतिहासमै पहिलो पटक भवानी राणा महिला अध्यक्ष बन्नु भएको छ । राष्ट्राध्यक्षसहित न्यायपालिका र व्यवस्थापिकामा पनि महिला नेतृत्व रहेका बेला निजी क्षेत्रले पनि महिला नेतृत्व पाएको हो ।
नवनियुक्त अध्यक्ष राणाले आज पदबहाली गर्नुहुनेछ । महासंघको नयाँ विधान अनुसार वरिष्ठ उपाध्यक्षबाट उहाँ स्वतः अध्यक्ष बन्नुभएको हो । राणालाई निवर्तमान अध्यक्ष पशुपति मुरारकाले पद हस्तान्तरण गर्नुहुनेछ ।
यसैगरी, महासंघको नयाँ नेतृत्वका लागि भएको निर्वाचनमा शेखर गोल्छा वरिष्ठ उपाध्यक्ष निर्वाचित हुनुभएको छ । गोल्छाले प्रतिद्वन्द्वी किशोर प्रधानलाई फराकिलो मत अन्तरले हराउनुभएको हो । गोल्छाले ६३ दशमलब ३० तथा प्रधानले ३६ दशमलब ७० प्रतिशत मत प्राप्त गर्नुभएको निर्वाचन समितिले जनाएको छ । जितसँगै गोल्छा तीन वर्षपछि महासंघको अध्यक्ष बन्ने पक्का भएको छ ।
महासंघको नयाँ विधानअनुसार वरिष्ठ उपाध्यक्ष अर्को कार्यकालमा स्वतः अध्यक्ष हुनेछ । यसअनुसार तीन वर्षपछि ५२ औं साधारणसभाबाट गोल्छा स्वतः अध्यक्ष हुनुहुने छ । देशको पुनारो औद्योगिक घराना गोल्छा समूहका कार्यकारी निर्देशक युवा उद्यमी गोल्छा यसअघि एसोसिएटतर्फ उपाध्यक्ष हुनुहुन्थ्यो भने प्रधान जिल्ला नगरबाट उपाध्यक्ष हुनुहुन्थ्यो ।
जिल्ला र नगर समूहको उपाध्यक्षमा प्रधान समूहबाट प्रमोद श्रेष्ठ विजयी हुनुभएको छ । उहाँले ५३ तथा उहाँका प्रतिद्वन्द्वी दिलिप श्रेष्ठले ४७ मत पाउनुभयो । वस्तुगततर्फको उपाध्यक्षामा गोल्छा समूहका उमेशलाल श्रेष्ठ विजयी हुनभएको छ । वरिष्ठ उपाध्यक्षमा निर्वाचित गोल्छाले आफ्नो कार्यकालमा नीतिगत सुधारमा विशेष महत्व दिने बताउनुभएको छ ।
उद्योग वाणिज्य महासंघ पहिलो पटक महिलाको नेतृत्वमा
0 comments:
Post a Comment